mánudagur, 8. mars 2021
 
TölublöðVenjuleg útgáfa

Börkur og Beitir á loðnu

15. febrúar 2021 kl. 13:13

Um borð í Beiti NK á loðnumiðum fyrir nokkrum árum. Mynd/Helgi Freyr Ólafsson

Uppsjávarskip Síldarvinnslunnar, Börkur og Beitir, héldu til loðnuveiða í gær og hafa samstarf um veiðarnar.

Síldarvinnsluskipin Beitir og Börkur héldu til loðnuveiða í gær.

Síldarvinnslan greinir frá því að veðrið hafi verið heldur óhagstætt á miðunum en í morgun hafði það heldur gengið niður.

„Samkomulag hefur verið gert við áhafnir Beitis og Barkar um samstarf skipanna við loðnuveiðarnar,“ segir á vef Síldarvinnslunnar. „Samstarfið felst í því að skipin skipuleggi veiðarnar þannig að þau skiptist á að koma með sem ferskastan afla að landi hverju sinni til að tryggja sem mest gæði framleiðslunnar. Þess vegna er gert ráð fyrir að afla verði dælt á milli skipanna á miðunum ef á þarf að halda. Áhafnirnar munu síðan skipta aflaverðmætunum á milli sín.“

Síldarvinnslan segir samstarf sem þetta ekki hafa verið reynt við loðnuveiðar áður en það hafi gefist vel hjá Síldarvinnsluskipunum á makrílvertíðinni sl. sumar.

„Við erum á Meðallandsbugtinni og það er víða eitthvað að sjá. Við erum að skoða þetta núna. Hér er heldur leiðinleg sunnanátt en það er vel hægt að kasta þannig að veðrið háir okkur ekki“, segir Tómas Kárason skipstjóra á Beiti í spjalli við skrifara heimasíðu fyrirtækisins.