þriðjudagur, 15. júní 2021
 
TölublöðVenjuleg útgáfa

Búnir að rjúfa 3.000 tonna múrinn

4. júní 2021 kl. 15:05

Harðbakur EA. Mynd/Samherji

Á rúmlega eitt hundrað sólarhringum hefur Harðbakur landað 37 sinnum og aflinn er rúmlega 3.000 tonn.

Harðbakur EA, ískfiskskip Útgerðarfélags Akureyringa landaði fullfermi á Dalvík snemma í morgun, um 90 tonnum af slægðum fiski, aðallega þorski. Á rúmlega eitt hundrað sólarhringum hefur Harðbakur landað 37 sinnum og aflinn er rúmlega 3.000 tonn. Að jafnaði hefur því verið landað um 80 tonnum eftir hverja veiðiferð, að því segir í umfjöllun á heimasíðu Samherja.

Guðmundur Ingvar Guðmundsson skipstjóri segir að þessi túr hafi tekið tvo og hálfan sólarhring, rétt um sólarhring hafi tekið að fylla skipið.

„Við vorum fyrir norðan Hornstrandir og þetta er mjög góður fiskur, rúmlega fjögur kíló og við vorum að taka sjö til átta tonn í holi. Við erum ellefu um borð, allt saman stálkarlar. Harðbakur hefur aðallega landað Í Þorlákshöfn, Hafnarfirði, Grundarfirði og í Bolungarvík, frá þessum stöðum er hráefninu svo ekið norður til Dalvíkur og Akureyrar. Í raun og veru er oftast landað næst þeim stað sem við erum við veiðar, sem skýrir fjölda veiðiferðanna að nokkru. “

Harðbakur kom nýr til Akureyrar seint á síðasta ári en skipið var smíðað í Noregi. Guðmundur segir skipið gott í alla staði, bæði hvað varðar vinnslubúnað og aðbúnað áhafnarinnar.

„Það eru tvær áhafnir á skipinu, Covid hefur haft töluverð áhrif á frítúra en núna fer þetta allt saman að komast í rétt horf hjá okkur. Jú, jú, það var sannarlega indæl tilfinning að sigla inn Eyjafjörðinn í nótt með fullfermi af góðum fiski og ekki skemmir fyrir að hafa rofið 3.000 tonna múrinn í leiðinni,“ segir Guðmundur skipstjóri.