mánudagur, 8. mars 2021
 
TölublöðVenjuleg útgáfa

Eimskip eykur þjónustu í útflutningi á ferskvöru

9. febrúar 2021 kl. 14:45

Mynd/Eimskip

Í fyrstu verður flutningur á ferskum laxi frá Færeyjum og Íslandi í fyrirrúmi en líklegt er að hvítfiskur og fleiri vörur bætist við á næstu misserum.

Eimskip greinir frá því að félagið mun á næstu vikum auka við þjónustu við útflytjendur á ferskvöru frá Færeyjum og Íslandi til Bandaríkjanna og Kanada. Félagið mun aðlaga siglingakerfi sitt til að mæta kröfum viðskiptavina um styttri flutningstíma, umhverfisvænni flutninga og ferskari og verðmætari vöru. Brottför á Ameríkuleið félagsins frá Íslandi er flýtt og viðkomuhöfnum á vesturleið fækkað til að ná vörum á markað fyrr í vikunni sem skiptir viðskiptavini félagsins mjög miklu máli, segir í frétt félagsins.

Eins segir að með því að aðlaga siglingakerfið með þessum hætti sé mögulegt að bjóða enn betri valkost í útflutningi á ferskum afurðum vestur um haf sem hafa verið vaxandi á síðustu misserum.

„Við leggjum mikla áherslu á sjálfbærni í okkar rekstri og finnum fyrir auknum áhuga viðskiptavina okkar á umhverfisvænni flutningum og því jákvætt að geta bætt þessa þjónustu. Við þekkjum dæmi þess að viðskiptavinir okkar hafi markað sér þá stefnu að nota eingöngu skip í flutninga á sínum vörum í stað flugvéla en kolefnislosunin með skipi og flutningabíl á þessari leið miðað við eitt tonn af ferskvöru er til dæmis samanlagt um 95% lægri en í flugi.“, segir Vilhelm Már Þorsteinsson, forstjóri Eimskips, í fréttinni.

Í fyrstu verður flutningur á ferskum laxi frá Færeyjum og Íslandi í fyrirrúmi en líklegt er að hvítfiskur og fleiri vörur bætist við á næstu misserum enda hafa fjölmörg fyrirtæki sett umhverfismál á oddinn ásamt því að nýta sér framfarir í kælitækni og náð árangri með breyttri meðhöndlum afurða.

Breytingarnar taka gildi í lok mánaðarins.