föstudagur, 22. janúar 2021
 
TölublöðVenjuleg útgáfa

Ekki breyting á loðnuráðgjöf

12. janúar 2021 kl. 17:57

Ís var yfir stórum hluta leitarsvæðisins í mælingunni í síðustu viku. Mynd/Birkir Bárðarson

Fyrirhugað er að endurtaka mælingar þegar aðstæður leyfa með tilliti til hafíss, veðurs og útbreiðslu loðnu.

Loðnuleiðangri fimm skipa lauk nú um helgina. Hafís náði yfir stóran hluta rannsóknasvæðis og sýnt þykir að mun minna magn mældist af loðnu en í desember síðastliðinn.

Þetta kemur fram í tilkynningu frá Hafrannsóknastofnun. Verið er að vinna úr gögnum og stofnmat liggur ekki fyrir en engu að síður er orðið ljóst að ekki verði breyting á ráðgjöf sem byggði á mælingu í desember. Sú ráðgjöf hljóðaði upp á 22.000 tonn.

Fyrirhugað er að endurtaka mælingar þegar aðstæður leyfa með tilliti til hafíss, veðurs og útbreiðslu loðnu.

Rannsóknaskipin Árni Friðriksson og Bjarni Sæmundsson munu geta lagt í leiðangur með stuttum fyrirvara og í kjölfarið verður metin þörf á mögulegri aðkomu fleiri skipa.