þriðjudagur, 15. júní 2021
 
TölublöðVenjuleg útgáfa

Fínn blíðutúr hjá Blængi

10. maí 2021 kl. 14:10

Mynd/Hafþór Hreiðarsson

Með 500 tonn af blönduðum afla. Mest er af grálúðu, ufsa, gullkarfa og djúpkarfa.

Frystitogarinn Blængur NK kom til Hafnarfjarðar í morgun og þar er verið að landa úr honum. Aflinn er um 18.000 kassar að verðmæti 150 milljónir króna. 

Bjarni Ólafur Hjálmarsson skipstjóri segir í viðtali við heimasíðu Síldarvinnslunnar að túrinn hafi gengið vel í alla staði. 

„Þetta eru um 500 tonn af blönduðum afla. Mest er af grálúðu, ufsa, gullkarfa og djúpkarfa. Við byrjuðum túrinn fyrir austan en vorum síðan mest á suðvesturmiðum, frá Selvogsbanka og vestur í Skerjadýpi. Það var einmunablíða allan túrinn og ég hef varla upplifað aðra eins blíðu í veiðiferð. Gert er ráð fyrir að skipið haldi til veiða á ný síðdegis á morgun og þá verður stefnan tekin á Hampiðjutorgið fyrir vestan,“ segir Bjarni Ólafur.