sunnudagur, 7. mars 2021
 
TölublöðVenjuleg útgáfa

Fyrsta loðnan unnin eftir þriggja ára hlé

8. febrúar 2021 kl. 10:02

Fiskebas var fyrsti norski loðnubáturinn sem landaði í Neskaupstað. Mynd/Smári Geirsson

Norskir loðnubátar hófu landanir í Neskaupstað á laugardaginn - íslensku skipin fara ekki á veiðar fyrr en hægt er að vinna loðnu á Japansmarkað og unnt að vinna hrogn úr loðnunni.

Loðnuvinnsla hófst á ný í fiskiðjuveri Síldarvinnslunnar í Neskaupstað eftir tæplega þriggja ára hlé. Á laugardagsmorgun landaði norski báturinn Fiskebas 310 tonnum og í kjölfar hans kom Slaatteröy með rúm 100 tonn.

Frá þessu segir í frétt á heimasíðu Síldarvinnslunnar en í gærkvöldi kom síðan skipið Sjöbris með 360 tonn.

„Ýmsum finnst það sérkennilegt að Norðmenn skuli veiða loðnuna skammt út af Austfjörðum á meðan íslensku loðnuskipin liggja í landi en skýringin er einfaldlega sú að kvótinn er lítill og beðið er eftir því að unnt verði að veiða Japansloðnu og að unnt verði að vinna hrogn úr loðnunni,“ segir í umfjölluninni.

Að sögn Jóns Gunnars Sigurjónssonar yfirverkstjóra gengur vinnslan í fiskiðjuverinu afar vel.

„Þetta fer vel af stað og það er gott og gaman að finna loðnulyktina á ný. Hún er fersk og góð. Þetta er ágæt loðna en hún er ekki mjög stór og hrognafyllingin er enn ekki nægjanleg fyrir Japanina. Hér eru þrír Japanir sem fylgjast grannt með. Loðnunni fylgir ávallt ákveðin stemning og það er gaman að upplifa hana á ný,“ segir Jón Gunnar.