fimmtudagur, 25. febrúar 2021
 
TölublöðVenjuleg útgáfa

Fyrsta nótaviðgerðin á nýju verkstæði

19. febrúar 2021 kl. 10:33

Rav við nýtt verkstæði Hampiðjunnar í Neskaupstað. Mynd/Hampiðjan

Norska loðnuskipið Rav kom til Neskaupstaðar á mánudaginn í síðustu viku með illa rifna loðnunót. Unnið var myrkrana á milli í nýju verkstæði Hampiðjunnar og skipið komst fljótlega til veiða aftur.

Norska loðnuskipið Rav kom til Neskaupstaðar á mánudaginn í síðustu viku með illa rifna loðnunót.  Skipstjórinn og áhöfnin gerðu sér strax grein fyrir því að nótaviðgerðin væri stórt og mikið verkefni og það myndi taka marga daga að gera nótina veiðihæfa að nýju. 

Nótin var strax tekin inn eftir að skipið lagðist að bryggjunni fyrir framan nýja veiðarfæraverkstæðið. Það varð strax ljóst að þetta yrði  mikil vinna að koma loðnunótinni saman aftur og var því fenginn liðsauki frá Hampiðjunni í Reykjavík og einnig bættist við starfsmaður úr bænum í hópinn, eins og segir frá á heimasíðu fyrirtækisins.

„Þetta var í fyrsta skipti sem við tökum hringnót inn á verkstæðið til viðgerðar, segir Jón Einar rekstrarstjóri Hampiðjunnar í Neskaupstað.  Það var ánægjulegt að sjá að öll tæki og aðstaða virkaði mjög vel. Það er ljóst að verk eins og þetta hefði tekið mun lengri tíma á gamla verkstæðinu.“ 

Á miðvikudagskvöld ákvað skipstjóri og útgerð skipsins að láta breyta og lagfæra nótakassann á skipinu. Morguninn eftir mættu málmtæknimenn frá Vélaverkstæði G. Skúlasonar sem unnu af kappi við breytingarnar um borð þar  til skipið hélt til veiða á ný.

Unnið var að viðgerð á nótinni langt fram á kvöld alla daga vikunnar, eins og alltaf er gert þegar mikið liggur við og kláraðist viðgerðin á föstudagskvöld. Loðnunótin var strax hífð beint um borð og var komin aftur í nótakassann fyrir miðnætti og skipið hélt strax aftur á loðnumiðin undan Austfjörðum, segir í frétt fyrirtækisins.