þriðjudagur, 17. maí 2022
 
TölublöðVenjuleg útgáfa

Góð kolmunnaveiði og fyrstu skip til löndunar

19. apríl 2022 kl. 10:33

Vilhelm Þorsteinsson EA landar fyrsta kolmunnafarmi ársins í Neskaupstað. Mynd/Smári Geirsson

Vilhelm Þorsteinsson EA kom með fyrsta kolmunnafarm ársins til Neskaupstaðar í gærkvöldi.

Síðustu daga hefur verið góð kolmunnaveiði á gráa svæðinu suður af Færeyjum og hafa íslensku uppsjávarskipin hafið veiðar. Frá þessu er greint á heimasíðu Síldarvinnslunnar en Vilhelm Þorsteinsson EA kom með fyrsta kolmunnafarm ársins til Neskaupstaðar í gærkvöldi og er verið að landa úr skipinu.

Heimasíðan ræddi við Birki Hreinsson, skipstjóra á Vilhelm, í morgun og spurði fyrst hvort mikið væri að sjá af fiski á veiðislóðinni.

„Það var reyndar ekki mikið að sjá en engu að síður gengu veiðarnar þokkalega. Við komum með fullfermi eða 3100 tonn og er allur aflinn kældur. Aflinn fékkst í sex holum og þau voru mislöng eða frá 10 og upp í 18 tíma. Það liðu rétt rúmir fjórir sólarhringar frá því við köstuðum fyrst austarlega á gráa svæðinu og þar til lagt var af stað í land með fullfermi. Fiskurinn er að ganga þarna norður eftir en það hefur verið ágæt veiði í skosku lögsögunni að undanförnu. Annars hafa ekki verið jafnmörg skip að veiðum í skosku lögsögunni og undanfarin ár, sérstaklega eru norsku skipin fá núna. Mér líst vel á framhald veiðanna. Þetta lítur bara ágætlega út,“ segir Birkir.

Fleiri kolmunnaskip eru væntanleg til löndunar. Börkur NK er á landleið með fullfermi og er væntanlegur til Seyðisfjarðar síðdegis í dag og Hákon EA er væntanlegur til Neskaupstaðar í fyrramálið. Þá er Beitir NK að fylla þegar þetta er skrifað. Kolmunnavertíð er sem sagt hafin af fullum krafti, segir í frétt Síldarvinnslunnar.