Hafa næg verkefni fram á nýja árið

Sighvatur Bjarnason VE í dráttarbrautinni. Skipið verður klárt ef VSV þarf á því að halda til loðnuveiða. Mynd/Þorgeir Baldursson

Verkefnastaða Slippsins Akureyri hefur verið góð undanfarna mánuði og ljóst að sú staða mun haldast fram á næsta ár. Afhendingartími á aðföngum er mun lengri en áður og því skipulag verkefna til lengri tíma afar mikilvægt.

Í frétt Slippsins segir að meðal verkefna er endurnýjun vinnslubúnaðar í Frosta ÞH, sem er í eigu samnefndrar útgerðar á Grenivík. Þá eru frystitogarnir Arnar HU og Hrafn Sveinbjarnarson GK við viðlegukantinn en útgerðirnar Fisk Seafood og Þorbjörn gera skipin út.

Í Arnari HU var skipt um allar legur í togspili, skipið heilmálað og öxuldregið, upptekt á skrúfuhaus ásamt breytingum og smíði á nýjum búnaði fyrir vinnsludekkið. Kælismiðjan Frost hefur einnig unnið við breytingar á frystikerfinu í skipinu og aðstoðaði Slippurinn við að koma eldri búnaði frá borði og smíða undirstöður fyrir nýjan búnað.

Hrafn Sveinbjarnarson kom í Slippinn fyrir rúmum tveimur vikum síðan en til stendur að aðstoða Kælismiðjuna Frost við niðurrif á frystikerfinu í skipinu, smíða nýtt frystivélarrými, mála vinnsludekkið í skipinu ásamt öðrum minniháttar viðhaldsverkefnum.

Einnig er unnið að ráðgjöf og smíði búnaðar fyrir innlenda aðila sem og erlenda.

Erfiðara með aðföng

Sveinbjörn Pálsson, nýráðinn sviðsstjóri skipaþjónustu Slippsins Akureyri, er ánægður með verkefnastöðuna og sökum stærðar fyrirtækisins sé yfirleitt mögulegt að bæta við verkefnu, komi þær aðstæður upp.

„Við erum byrjaðir að fá inn bókanir fyrir næsta ár enda erum við að upplifa að afhendingartími á öllum aðföngum er mun lengri áður og því er mjög mikilvægt að skipuleggja verkefnin vel og huga snemma að viðhaldsmálum komandi mánaða. Við hjá Slippnum höfum verið að undirbúa okkur fyrir að geta þjónustað viðskiptavini okkar sem best, bæði með aukinni verkþekkingu sem og útvegun aðfanga í gegnum tengslanet okkar innanlands sem og erlendis. Útgerðir uppsjávarskipa eru nú í óða önn að undirbúa stóra loðnuvertíð og erum við nú að aðstoða útgerðirnar við undirbúning skipa fyrir hana. Þetta er gríðarleg lyftistöng fyrir útgerðina sem og alla þá sem starfa við að þjónusta sjávarútveginn,“ segir Sveinbjörn.