laugardagur, 24. október 2020
 
TölublöðVenjuleg útgáfa

Hagnaður síðasta árs 9 milljarðar króna

7. október 2020 kl. 07:26

Hátæknivinnslan á Dalvík hóf starfsemi um miðjan ágúst. Mynd/Samherji

Rekstrartekjur Samherja af botnfiskveiðum og vinnslu jukust um 1,7 milljarða króna en tekjur af uppsjávarútgerð drógust saman um 1,2 milljarða króna.Nýr Vilhelm er hins vegar væntanlegur til landsins 15. janúar næstkomandi.

Samherji hf. hagnaðist um rúmlega 9 milljarða króna á síðasta ári. Rekstrartekjur námu 48,9 milljörðum króna á árinu en helstu breytingar milli ára eru að rekstrartekjur af botnfiskveiðum og vinnslu jukust um 1,7 milljarða króna en tekjur af uppsjávarútgerð drógust saman um 1,2 milljarða króna. Tekjur af fiskeldi jukust um 412 milljónir króna. Samherji og starfsmenn fyrirtækisins greiddu 4,9 milljarða króna til hins opinbera á Íslandi á árinu 2019.

Þetta kemur fram í fréttatilkynningu fyrirtækisins. Þar segir að niðurstaða ársins sé í samræmi við væntingar og að stórum hluta afkomunnar hafi verið varið í fjárfestingar í þágu fyrirtækisins.

Þær veigamestu á árinu 2019 voru í nýju fiskvinnsluhúsi á Dalvík og smíði nýrra skipa.

„Rekstur Samherja er áfram traustur. Afkoman á síðasta ári var góð og var uppgjörið í samræmi við væntingar okkar stjórnenda. Rekstrarumhverfið hefur breyst mikið frá síðasta ársuppgjöri vegna Covid-19 heimsfaraldursins en áhrifin koma ekki fram strax. Við stöndum nú frammi fyrir nýjum veruleika þar sem eftirspurnin er að færast í auknum mæli frá veitingastöðum yfir í smásölu. Okkur hefur hins vegar tekist vel að aðlaga reksturinn að þeim breytingum sem hafa orðið á eftirspurn í kjölfar faraldursins,“ segir Þorsteinn Már Baldvinsson, forstjóri Samherja, í tilkynningunni.

Á árinu 2019 var Samherji með fimm ísfiskstogara og einn línu/netabát í rekstri á Íslandi. Nýr Harðbakur kom til landsins í lok árs og kom hann í rekstur á árinu 2020.

„Af eldri ísfiskskipum er Björgvin einn eftir. Huga þarf að endurnýjun hans innan tíðar enda er skipið komið til ára sinna og orðið viðhaldsfrekt,“ segir þar einnig.

Nýr Vilhelm kemur í janúar

Margrét EA var ein á uppsjávarveiðum á síðasta ári á vegum Samherja eftir að Vilhelm Þorsteinsson var afhentur nýjum eiganda í janúar 2019. Nýr Vilhelm er hins vegar væntanlegur til landsins 15. janúar næstkomandi og er stefnt að því hann fari á loðnuveiðar á nýju ári. Nýr Vilhelm verður búinn til bæði nóta og flotvörpuveiða og verður burðarmesta skip íslenska uppsjávarflotans.

„Það sem stendur upp úr frá síðasta ársuppgjöri er auðvitað opnun nýja vinnsluhússins á Dalvík. Vinnsla hófst í húsinu 14. ágúst og hefur hún gengið framar vonum. Nýja vinnsluhúsið er yfirlýsing um að Samherji hefur trú á fiskvinnslu í landi og hún er jafnframt yfirlýsing um að Samherji ætlar sér að halda uppi háu vinnslustigi á fiski á Íslandi um ókomna framtíð. Nær allur tækjabúnaður og tæknilausnir í nýju húsi eru framleiddar af íslenskum tæknifyrirtækjum og mun verða auglýsing fyrir þessi fyrirtæki á næstu árum og veita þeim samkeppnisforskot á alþjóðlegum mörkuðum,“ segir Þorsteinn Már.

Þess til viðbótar segir í tilkynningunni að ráðist hafi verið í ýmsar aðrar breytingar frá síðasta ársuppgjöri.

„Yfirgripsmikil endurskoðun á stjórnarháttum innan samstæðunnar stendur nú yfir og innan Samherja verður á næstunni kynnt innleiðing á kerfi fyrir stjórnarhætti og regluvörslu sem gilda á um öll félög innan samstæðunnar.“

Ársuppgjörið var kynnt á aðalfundi Samherja 2. október.