þriðjudagur, 17. maí 2022
 
TölublöðVenjuleg útgáfa

Harma ákvörðun sjávarútvegsráðherra

Svavar Hávarðsson
19. janúar 2022 kl. 08:45

Smábátar

Fontur, félag smábátaeigenda á Norðausturlandi gagnrýna skerðingu aflaheimilda til strandveiða harðlega.

Fontur, félag smábátaeigenda á Norðausturlandi hefur sent frá sér yfirlýsingu þar sem hörmuð er sú ákvörðun sjávarútvegsráðherra að skerða afla til strandveiða á komandi sumri. Félagið treystir því að hún verði endurskoðuð og 48 dagar tryggðir til veiðanna. 

Að mati félagsmanna Fonts sýnir ákvörðun ráðherra að knýjandi sé að breyta fyrirkomulagi á ráðstöfun aflaheimilda úr 5,3% pottinum. Strandveiðar eiga ekki að vera háðar viðskiptum uppsjávarútgerða með veiðiheimildir, að þeirra mati.

Í yfirlýsingu félagsins sem vitnað er til á heimasíðu Landssambands smábátaeigenda segir:

„Óumdeilt er að útgerð smábáta hefur spornað gegn samþjöppun og komið í veg fyrir að fjölbreyttur sjávarútvegur legðist af í hinum dreifðu byggðum. Strandveiðar yfir sumarið hafa tryggt útgerð hundruð smábáta sem landað hafa afla á tuga útgerðarstaða um land allt.  Þannig hafa hafnarmannvirki fengið endurnýjað hlutverk ásamt þjónustuaðilum.  Síðast en ekki síst hafa strandveiðarnar gefið nýjum aðilum tækifæri á að hefja útgerð. Veiðar smábáta á strandveiðum eru njörvaðar niður með alls konar takmörkunum.  Það sem stjórnvöld ná þó ekki til er náttúran sjálf;  veður og fiskgengd á grunnslóð.  Að vitna í ofanálag til vísindalegrar ráðgjafar Hafrannsóknastofnunar er til að æra óstöðugan.  Veiðar smábáta með handfærum þar sem aflinn sveiflast til og frá um 1% af leyfilegum heildarafla á enga samleið með vísindalegri nálgun.“