laugardagur, 24. október 2020
 
TölublöðVenjuleg útgáfa

Haustrallið hafið og stendur í fjórar vikur

9. október 2020 kl. 12:07

Rannsóknaskipið Árni Friðriksson leggur úr höfn. Mynd/Svanhildur Egilsdóttir

Tvö skip taka þátt í verkefninu; togarinn Múlaberg SI og Árni Friðriksson rannsóknaskip Hafrannsóknastofnunar.

Stofnmæling botnfiska að haustlagi er hafin og stendur yfir næstu fjórar vikur. Tvö skip taka þátt í verkefninu; togarinn Múlaberg SI og rannsóknaskipið Árni Friðriksson. Togað verður á rúmlega 370 stöðvum umhverfis landið. Þetta mun vera í 25 skipti sem farið er í stofnmælingu botnfiska að haustlagi.

Þetta kemur fram í tilkynningu frá Hafrannsóknastofnun.

Verkefnið sem einnig er nefnt haustrall, hefur verið framkvæmt með sambærilegum hætti á hverju ári síðan 1996. Svæðinu er skipt í grunn- og djúpslóð og er togað niður á allt að 1300 m dýpi.

Helsta markmið er að fylgjast með breytingum á stofnstærð, aldri, fæðu, ástandi og útbreiðslu botnfisktegunda við landið. Erfðasýni verða tekin úr grálúðu sem verður einnig merkt. Athuganir verða gerðar á botndýrum og mat lagt á magn ýmiskonar rusls á sjávarbotni.

Sjö til tíu rannsóknamenn eru á hverju skipi auk áhafnar.

Fylgjast má með ferðum skipanna á https://skip.hafro.is/ og þar sjást einnig togstöðvar í haustralli.