mánudagur, 1. mars 2021
 
TölublöðVenjuleg útgáfa

„Hér er sko alvöru vertíðarganga á ferðinni“

23. febrúar 2021 kl. 11:14

Stóra torfan í Jökuldýpinu á mælum Polar Amaroq. Mynd/Síldarvinnslan

Geir Zoëga skipstjóri á Polar Amaroq fann mikið af loðnu í Jökuldýpinu. Telur hann nokkur hundruð þúsund tonn vera í einni torfu og er við mælingar á henni.

Grænlenska uppsjávarskipið Polar Amaroq landaði fullfermi af frystri loðnu í Hafnarfirði í gær. Að löndun lokinni ákvað Geir Zoëga skipstjóri að kanna hvort loðnu væri að finna í Jökuldýpinu norðvestur úr Garðskaga. Hann þurfti ekki að leita lengi, segir í frétt á heimasíðu Síldarvinnslunnar. 

Í fréttinni segir: 

„Við komum hérna í svakalega torfu. Hún er tæpar fimm sjómílur á lengd og þétt. Hún er frá kili og niður undir botn. Hér er sko alvöru vertíðarganga á ferðinni. Þetta hljóta að vera nokkur hundruð þúsund tonn. Við erum nú að mæla þessa risalóðningu og síðan ætlum við að svipast frekar um. Þessi ganga hér verður væntanlega komin inn á Breiðafjörð um helgina og mun líklega hrygna þar í næstu viku. Það fréttist af loðnu víða þessa dagana. Það virðist vera loðna héðan frá Faxaflóanum og austur með allri suðurströndinni. Það hefur til dæmis verið mikil loðna í Háfadýpinu. Síðan hafa borist fréttir af loðnu fyrir norðan land og nú mun Bjarni Sæmundsson vera að kanna stöðuna þar. Þetta er alvöru, það fer ekkert á milli mála," segir Geir.