laugardagur, 5. desember 2020
 
TölublöðVenjuleg útgáfa

Í mokveiði af tveggja handa ufsa

Guðjón Guðmundsson
5. nóvember 2020 kl. 09:50

Þórunn Sveins er glæsilegt skip eftir lenginguna. Mynd/Óskar P. Friðriksson

Þórunn Sveinsdóttir skilar eðal hráefni eftir endurbætur.

Vel hefur gengið á Þórunni Sveinsdóttur VE eftir að skipið kom úr lengingu frá Danmörku fyrir rúmu ári. Nýlega landaði skipið 200 tonnum eftir tæpa fimm daga á veiðum og segir Gylfi Sigurjónsson skipstjóri að góður gangur hafi verið í veiðunum.

Skipið var lengt um 6,6 metra sem skilaði meðal annars plássi fyrir 200 viðbótarkör í lest. Þá var sett í það forkæling upp á dekki þannig að nú fer allur fiskur við núll gráður ofan í lest. Það er því kjör hráefni sem Þórunn Sveinsdóttir kemur með að landi.

„Þetta var bara mokfiskerí en við vorum svo sem heppnir líka og náðum þarna í um 90 tonn af ufsa þannig að við kvörtum ekki. Við byrjuðum á Breiðamerkurdýpi og fórum svo út á Pung og á Verkamannabanka. Við fórum því víða og það var töluvert um keyrslu. Við þurfum að gera þetta svona á þessum árstíma og þetta er alltaf sólarhringskeyrsla hvora leið á miðin,” segir Gylfi.

Tveggja handa ufsi

Hann segir óvenjumikinn ufsa hafa fengist og þetta hafi allt verið stór ufsi; tveggja handa ufsi eins og hann kallast. Annars var aflinn blanda af þorski, ýsu og karfa, allt saman mjög vænn fiskur. Gylfi kveðst ekki muna eftir jafngóðri veiði áður á þessum árstíma og það óvenjulega hafi líka verið hve blandaður aflinn var.

„Við seljum stærsta fiskinn út og erum að fá alveg dúndurverð fyrir hann. Þeir biðja um einn gám á viku og vilja ekki meira og við erum að fá miklu hærra verð en á mörkuðunum hérna heima. Þetta eru bein viðskipti með óunninn fisk við framleiðanda Fish&Chips á Bretlandi og þeir vilja bara fisk frá okkur. Við þurfum að eiga fyrir þá alltaf nálægt 18 tonnum af stórum fiski í hverri viku. Allur smærri þorskurinn, ufsinn og annað fer til vinnslu hérna. Milli 60-70% af því sem við fengum síðast fór til vinnslu hjá Leo Seafood hérna í Eyjum,“ segir Gylfi.

Eitt síðasta fjölskyldufyrirtækið

Smit kom upp í Þórunni Sveinsdóttur seint í september og segir Gylfi það í raun kraftaverk hve vel leystist úr því. Einn úr áhöfninni var smitaður en einkennalaus um borð í tvær vikur og smitaði einungis einn annan úr áhöfninni. Vegna þessa var skipið svo í framhaldinu frá veiðum í eina viku meðan áhöfnin var í sóttkví.

Gylfi á ekki langt að sækja fengsældina því faðir hans, Sigurjón Óskarsson, er einn mesti aflaskipstjóri sem Eyjarnar hafa alið. Bróðir hans Viðar var ekki síður fengsæll en hann er nú kominn í land og stýrir útgerðinni ásamt föður þeirra og systur sem stýrir bókhaldinu. Útgerðin er ein fárra fjölskylduútgerða sem eftir eru í Eyjum og þeim fækkaði enn um eina í síðasta mánuði þegar Bergur-Huginn, dótturfélag Síldarvinnslunnar í Neskaupstað, keypti Berg ehf. sem gerði út samnefndan togara.