laugardagur, 25. september 2021
 
TölublöðVenjuleg útgáfa

Landtengingarverkefni Síldarvinnslunnar styrkt

14. september 2021 kl. 16:55

Börkur NK landtengdur í Norðfjarðarhöfn. Mynd/Smári Geirsson

Búnaður sem Síldarvinnslan setti upp í Norðfjarðarhöfn til að landtengja uppsjávarskip er þau landa afla sínum hefur verið úthlutað 19,5 milljónum króna úr Orkusjóði.

Nýverið var úthlutað 470 milljónum króna úr Orkusjóði til yfir 100 verkefna í orkuskiptum og fékk Síldarvinnslan 19,5 milljóna styrk til verkefnisins „landtenging uppsjávarskipa.“

Fyrr í þessum mánuði var búnaður til landtengingar uppsjávarskipa tekinn í notkun í Norðfjarðarhöfn en það er Síldarvinnslan sem er eigandi búnaðarins og hefur kostað þróun hans. Í landtengingunni felst að skip, sem er að landa afla, fær raforku úr landi til að kæla aflann, dæla honum á land og sinna annarri raforkunotkun um borð í stað þess að framleiða orku með vélbúnaði sem nýtir olíu sem orkugjafa. Hér er um að ræða mikilvægt umhverfismál og samkvæmt fyrirliggjandi heimildum er þetta í fyrsta sinn sem fiskiskip eru landtengd með svo aflmikilli tengingu. Gert er ráð fyrir að þegar öll uppsjávarskip, sem landa afla í Neskaupstað, verði komin með tilheyrandi tengibúnað muni olíunotkun þeirra minnka um 300.000 lítra á ári.

Síldarvinnslan greindi frá þessum tímamótum fyrir skemmstu, sem og Fiskifréttir.