sunnudagur, 11. apríl 2021
 
TölublöðVenjuleg útgáfa

Loðnuhrognavinnsla hafin á Akranesi

Guðjón Guðmundsson
2. mars 2021 kl. 18:07

Venus NS með 500 tonn úr Breiðafirði

Vinnsla á loðnuhrognum hófst á vegum Brims á Akranesi snemma í morgun. Venus NS kom til hafnar á Akranesi laust fyrir miðnætti í gærkvöldi með rúm 500 tonn af loðnu og lauk löndun nú fyrir hádegi.

,,Við fengum þennan afla í Breiðafirði en loðnan er komin mun norðar, og langt inn í Breiðafjörðinn, en við höfum átt að venjast miðað við árstíma,” segir Bergur Einarsson skipstjóri Venus á heimasíðu Brims. Bergur segir að þroski hrognanna sé góður.

Að sögn Bergs hafa menn séð lítið af loðnu í Breiðafirði í dag en fréttir berast af stórri göngu út af Grindavík.

,,Sú loðna hentar þó ekki enn til hrognatöku. Til þess er þroskinn ekki nægur. Hún verður hins vegar fín þegar hún kemur norður að Snæfellsnesi.”

Bergur segir að Víkingur AK sé á miðunum. Nú verði eftirstöðvar kvótans nýttar til að veiða sem mest af loðnu til hrognatöku og  -vinnslu. Fyrirhugað er að frysta loðnuhrognin jöfnum höndum á Akranesi og Vopnafirði.