sunnudagur, 24. janúar 2021
 
TölublöðVenjuleg útgáfa

Loðnumælingar eins fljótt og veður leyfir

23. desember 2020 kl. 23:33

Áætlað yfirferðasvæði loðnumælinga fimm skipa í byrjun janúar 2021. Mynd/Hafrannsóknastofnun

Hafrannsóknastofnun áætlar að halda til loðnumælinga 4. janúar.

Hafrannsóknastofnun áætlar að halda til loðnumælinga 4. janúar eða eins snemma og veður leyfir. Mælingarnar verða framkvæmdar á rannsóknaskipunum Árna Friðrikssyni og Bjarna Sæmundssyni ásamt loðnuveiðiskipunum Ásgrími Halldórssyni SF, Aðalsteini Jónssyni SU og grænlenska skipinu Polar Amaroq. 

Um borð í öllum skipunum verða þrír starfsmenn Hafrannsóknastofnunar við að vakta bergmálstæki og vinna úr sýnum. Áætlað er að yfirferðasvæðið verði lítið eitt stærra en svæðið sem var farið yfir í desember og leiddi til veiðiráðgjafar upp á 22.000 tonn. Vonast er til að hægt verði að ná yfir svæðið út af Vestfjörðum sem var að hluta til hulið hafís í desembermælingunni.

Á áætlun er að farið verði aftur til mælinga í byrjun febrúar. Nákvæm tímasetning og umfang þess leiðangurs mun m.a. ráðast af veðri, útbreiðslu loðnu og aðstæðum til mælinga.