sunnudagur, 7. mars 2021
 
TölublöðVenjuleg útgáfa

Ný ráðgjöf í loðnu - 127.000 tonn

4. febrúar 2021 kl. 18:18

Dreifing loðnu í leiðangrinum 26. - 30. janúar. MYND/Hafrannsóknastofnun

Hafrannsóknastofnun leggur til að loðnuafli vertíðarinnar verði rúmlega helmingi hærri en fyrri ráðgjöf sem var 61.000 tonn.

„Hafrannsóknastofnun leggur til að loðnuafli á vertíðinni 2020/21 verði 127 300 tonn. Kemur sú ráðgjöf í stað þeirrar sem gefin var út 24. janúar 2021.“ 

Hafrannsóknastofnun greinir frá þessu á vef sínum og í fréttatilkynningu.

„Byggir ráðgjöfin á summu tveggja leiðangra sem fóru fram seinni part janúar og gáfu mat á stærð hrygningarstofns loðnu upp á samtals 650 þúsund tonn.“

Ennfremur segir í tilkynningunni:

„Dreifing loðnu ásamt forsendum um göngustefnu og tímasetningar var lögð til grundvallar á ákvörðun um samlagningu mælinganna með þessum hætti. Heildaryfirferð þessara tveggja leiðangra er talin ná yfir allt útbreiðslusvæði hrygningarloðnu. Það gilti ekki um mælingar í desember og fyrri hluta janúar og því voru niðurstöður þeirra ekki notaðar í þessari lokaráðgjöf.

Ráðgjöf um aflamark byggist á því að 95% líkur séu á að hrygningarstofninn í mars verði yfir 150 000 tonnum að teknu tilliti til afráns. Samkvæmt því leiðir þessi heildarmæling til veiðiráðgjafar upp á 127 300 tonn veturinn 2020/21 og kemur í stað fyrri ráðgjafar frá því í janúar.“