mánudagur, 27. september 2021
 
TölublöðVenjuleg útgáfa

Lönduðu hátt í 800 tonnum af grálúðu

10. september 2021 kl. 15:00

Cuxhaven NC 100. Mynd/Guðmundur St. Valdimarsson

Löndun úr Cuxhaven hefur margvísleg jákvæð áhrif á atvinnulífið. Skipið var fimmtíu daga í túrnum og er á leið á sömu mið að nýju - Dormbanka við Grænland.

Hátt í átta hundruð tonnum af grálúðu var landað á Akureyri úr togaranum Cuxhaven NC 100 sem kom til hafnar á Akureyri á fimmtudaginn. Cuxhaven er í eigu dótturfélags Samherja í Þýskalandi, Deutsche Fischfang Union.

Stefán Viðar Þórisson skipstjóri segir í viðtali við heimasíðu Samherja að haldið var til veiða frá Akureyri 22. júlí, og túrinn var því fimmtíu sólarhringar, höfn í höfn. Aflinn var hátt í 900 tonn af grálúðu upp úr sjó, sem gera um 770 tonn af afurðum sem fara aðallega á Asíumarkað.

Stefán Viðar Þórisson skipstjóri segir að veiðisvæðið hafi verið norður af Dormbanka við Grænland.

„Þetta nuddaðist áfram á jöfnum og góðum hraða. Fiskurinn er góður og allar aðstæður um borð eru með þeim hætti að við erum að koma með gæðaafurðir. Meðferð aflans er númer eitt hjá okkur enda kaupendur kröfuharðir. Allur aflinn fer sjálfvirkt á bretti í vinnslunni um borð og við löndun þarf einungis tvo menn á lyftara í lestinni, þannig að löndunin gekk fljótt og vel fyrir sig,” segir Stefán.

Í umfjölluninni er bent á að þegar svo stórt skip kemur til hafnar eftir nærri tveggja mánaða túr er viðbúið að margir séu kallaðir til.

„Já, það segir sig sjálft. Það er ekki bara löndunargengið og flutningafyrirtækin sem þurfa að vera klár svo að segja strax og við leggjumst að bryggju. Fjölmörg þjónustufyrirtæki eru að vinna um borð við ýmsar endurbætur og viðhald. Við þurfum kost í næsta túr, olíu , varahluti og svo framvegis. Virðisaukinn við svona löndun hefur klárlega áhrif á fjölmarga þætti atvinnu- og þjónustustarfsemi hérna fyrir norðan. Hafnargjöld og önnur opinber gjöld sem lögð eru sérstaklega á erlend skip eru auk þess veruleg og hærri hér en í öðrum löndum og nær því virðisaukinn til samfélagsins alls.”