föstudagur, 21. janúar 2022
 
TölublöðVenjuleg útgáfa

Mokveiddu stórþorsk á þekktri rækjuslóð

1. desember 2021 kl. 14:30

Viðey RE. Mynd/Brim

Viðey fékk góðan afla á Dohrn-banka og allt stórþorskur. Veiðin þar skilaði 15-16 tonnum af lifur, sem er til marks um stærð fiskjarins sem var troðinn af loðnu.

Ísfisktogari Brims, Viðey RE, kom til hafnar í Reykjavík á mánudag með svo til fullfermi, 170 til 180 tonn. Aflinn fékkst m.a. á Dohrn-bankanum á milli Íslands og Grænlands en umrætt veiðisvæði hefur ekki verið þekkt fyrir annað en rækjuveiðar fram að þessu.

Frá þessu segir í frétt á heimasíðu Brims.

„Þegar verið er að veiða þorsk leitar maður helst fyrir sér þar sem þann fisk er að finna. Að þessu sinni var það Dohrn-bankinn en mér kom það verulega á óvart hve stór þorskurinn var og vel haldinn. Um þriðjungur aflans var þorskur átta kíló eða stærri og fiskurinn var úttroðinn af loðnu. Við fengum þó enga loðnu ánetjaða enda er uppsjávarskipaflotinn að leita að veiðanlegu magni mun austar, djúpt út af Norðurlandi,” segir Jóhannes Ellert Eiríksson, skipstjóri, í fréttinni.

Þar segir jafnframt að margir eiga örugglega erfitt með að staðsetja Dohrn-bankann enda er langt síðan íslensk skip fóru þangað til veiða. Til fróðleiks má geta þess að Dohrn-bankinn er norðvestur af Vestfjörðum á miðlínunni milli Íslands og Grænlands. Þarna fékkst mjög stór rækja á árunum í kring um 1990 og var veiðisvæðið töluvert stærra Grænlands megin við djúpálinn sem þarna er.

Að sögn Jóhannesar var horfið þaðan þegar meira en nóg var komið af þorski fyrir vinnsluna.

„Við komum einnig við í Víkurálnum og þar var bæði þorskur og karfi. Þorskveiðin var þó ekkert í líkingu við Dohrn-bankann og stórþorskinn þar. Við erum með um 15-16 tonn af lifur eftir túrinn og það segir sitt um stærð þorsksins,” segir Jóhannes.