fimmtudagur, 9. desember 2021
 
TölublöðVenjuleg útgáfa

Næturveiði á karfa kom á óvart

25. nóvember 2021 kl. 12:30

Helga María AK. mynd/Brim

Veður hefur veruleg áhrif á aflabrögð þessa daga og vikur. Friðleifur Einarsson, skipstjóri á Helgu Maríu, segir að áður fyrr hafi sjómenn mátt eiga von á hverju sem er en veðurspár dagsins í dag gangi yfirleitt fullkomlega eftir.

Ísfisktogari Brims, Helga María AK, kom í gær við fyrir stutt löndunarstopp í Reykjavík. Skipstjórinn, Friðleifur Einarsson, segir að stefnt sé aftur á Vestfjarðamið en þar var skipið að veiðum í síðustu veiðiferð, að því er segir í frétt fyrirtækisins.

„Þetta er búinn að vera þó nokkur barningur síðustu daga. Það hefur gengið verr að fá góðan afla og það hefur þurft að hafa fyrir hlutunum. Við vorum með um 125 tonn í síðasta túr og við erum ánægðir með það miðað við aðstæður,” segir Friðleifur en hann tekur sérstaklega fram að leitun sé að ufsa og þorski fyrir vestan nú um stundir og þá sé ekki karfatími.

Hann segist hafa hafið veiðar í Víkurálnum.

„Þar fengum við dálítið af ufsa og svo fengum við 20 tonn af gullkarfa og það að næturlagi. Það kom verulega á óvart.”

Að sögn Friðleifs var einnig farið í Þverálinn og þvælst um kantinn en alls staðar fékkst minna en vonir stóðu til. Veðrið hefur verið fremur rysjótt að undanförnu og það er því ekki skrýtið að veðurspár beri á góma.

„Maður, biddu fyrir þér. Spárnar nú og það sem var tekið gott og gilt á sínum tíma eru ekki sambærilegar. Hér áður fyrr gátu menn átt von á öllu en nú er hending ef veðurspárnar ganga ekki fullkomlega eftir,” segir Friðleifur.