sunnudagur, 7. mars 2021
 
TölublöðVenjuleg útgáfa

Reglugerð framlengir línuívilnun

12. febrúar 2021 kl. 16:56

Mynd/Landssamband smábátaeigenda

Ráðherra afturkallaði fyrri ákvörðun um að línuívilnun falli niður frá og með deginum í dag.

 

Kristján Þór Júlíusson sjávarútvegs- og landbúnaðarráðherra hefur undirritað breytingu á reglugerð um línuívilnun. Breytingin afturkallar fyrri ákvörðun um að línuívilnun falli niður frá og með deginum í dag.  Að óbreyttu hefði línuívilnun fallur niður það sem eftir er þessa mánaðar.

Í upphafi fiskveiðiársins þann 1. september skipulögðu útgerðir sig þannig að viðmiðun til línuívilnunar yrðu ekki lægri en 1.200 tonn í þorski sem er réttur þriðjungur sem hún var tveimur árum fyrr.  Hin gríðarmikla skerðing milli ára kom mönnum á óvart þar sem hún var ekki í neinu samræmi við breytingar á þorskkvótanum, segir á heimasíðu Landssamband smábátaeigenda.

 LS sendi ráðherra bréf þar sem óskað var eftir því að aflaviðmiðun til línuívilnunar yrði leiðrétt þannig að útgerðir þeirra báta sitji við sama borð og aðrar útgerðir í landinu.

Stöðvun línuívilnunar hefði valdið erfiðleikum hjá landverkafólki sem starfar við beitningu. Um hundruð starfa er að ræða og því mikið í húfi fyrir starfsfólk þeirra 84 útgerða sem fengið hafa línuívilnun. 

Í stað þess að II. tímabil gildi til loka febrúar, kveður reglugerðin á um að tímabilinu hafi lokið í gær 11. febrúar og í dag hefjist III. tímabil sem gildir út maí.