þriðjudagur, 17. maí 2022
 
TölublöðVenjuleg útgáfa

Síldarvinnslan tekið á móti 60.000 tonnum

24. janúar 2022 kl. 14:53

Fiskimjölsverksmiðja Síldarvinnslunnar á Seyðisfirði. Mynd/Ómar Bogason

Vinnsla á loðnu hjá Síldarvinnslunni hefur gengið vel það sem af er vertíð. Síðustu daga hefur vinnsla þó dottið niður þar sem dregið hefur úr veiði.

Fiskimjölsverksmiðjur Síldarvinnslunnar í Neskaupstað og á Seyðisfirði hafa samtals tekið á móti um 60.000 tonnum af loðnu frá því að veiðar hófust í desember.

Frá þessu segir á heimasíðu fyrirtækisins en verksmiðjan á Seyðisfirði hefur tekið á móti 32.500 tonnum og hefur vinnsla gengið vel að sögn Eggerts Ólafs Einarssonar verksmiðjustjóra.

„Það hefur gengið vel að vinna og sérstaklega hafa tvær síðustu vikur verið góðar. Að jafnaði vinnum við um 1.100 tonn á sólarhring. Það mætti vera dálítið meiri veiði því við höfum þrisvar stoppað í stuttan tíma vegna hráefnisskorts. Annars líst okkur afskaplega vel á vertíðina,“ segir Eggert Ólafur.

Hafþór Eiríksson, verksmiðjustjóri í Neskaupstað, er einnig í viðtali í frétt Síldarvinnslunnar og tekur undir með Eggert og segir að veiðin mætti vera meiri.

„Vinnsla hjá okkur hefur gengið afar vel. Hráefnið er mjög gott og ferskt. Við höfum tekið á móti 27.000 tonnum frá því að loðnuveiðin hófst í desember og núna er grænlenska skipið Polar Ammasak að landa 1.750 tonnum. Framhaldið lítur vel út,“ segir Hafþór.

Að sögn Jóns Gunnars Sigurjónssonar, yfirverkstjóra í fiskiðjuveri Síldarvinnslunnar í Neskaupstað, er búið að frysta 1.600 tonn af loðnu í fiskiðjuverinu á vertíðinni.

„Við frystum einungis í þrjá daga en löng hol, ótíð og áta í loðnunni hefur gert það að verkum að hún hefur ekki verið heppilegt hráefni til frystingar. Ég geri hins vegar ráð fyrir að frysting hefjist af krafti um mánaðamótin og þá muni veiðast stór og átulaus loðna sem verður gott hráefni fyrir okkur,“ segir Jón Gunnar í fréttinni.