föstudagur, 22. janúar 2021
 
TölublöðVenjuleg útgáfa

Skipin halda til veiða eftir hátíðirnar

4. janúar 2021 kl. 12:01

Polar Amaroq í Norðfjarðarhöfn. Skipið heldur væntanlega til loðnuleitar í kvöld. Mynd/Hákon Ernuson

Skip Síldarvinnslunnar í Neskaupstað eru flest komin á veiðar. Kolmunnaveiðar eru þegar hafnar suðaustur af Færeyjum.

Skip Síldarvinnslunnar og tengdra fyrirtækja hafa nú öll haldið til veiða, með þeim undantekningum þó að frystitogarinn Blængur NK er í slipp á Akureyri og Polar Amaroq sem taka mun þátt í loðnuleit. 

Þetta kemur fram í frétt Síldarvinnslunnar.

Þar segir að kolmunnaskipin Beitir NK og Börkur NK létu úr höfn aðfaranótt sunnudags og Bjarni Ólafsson AK hélt fljótlega í kjölfar þeirra. Börkur og Beitir höfðu kastað í morgun á kolmunnamiðunum suðaustur af Færeyjum en færeysk skip hafa verið þar að veiðum að undanförnu. 

Ísfisktogararnir héldu til veiða um helgina. Bergey VE sigldi út úr Vestmannaeyjahöfn á laugardagsmorgun og Vestmannaey VE í gær. Gullver NS hélt frá Seyðisfirði á laugardag. 

Grænlenska uppsjávarskipið Polar Amaroq heldur væntanlega til loðnuleitar í kvöld. Mun Polar Amaroq leita að loðnu ásamt hafrannsóknaskipunum Bjarna Sæmundssyni og Árna Friðrikssyni og veiðiskipunum Ásgrími Halldórssyni SF og Aðalsteini Jónssyni SU.