mánudagur, 25. október 2021
 
TölublöðVenjuleg útgáfa

Stækka landeldisstöð um helming

13. október 2021 kl. 09:30

Tölvugerð mynd af laxeldisstöðinni eftir stækkun. Mynd/Samherji

Samherji fiskeldi hefur ákveðið að stækka landeldisstöð sína í Öxarfirði og framleiðslan þar verði 3.000 tonn í framtíðinni. Um mikla framkvæmd er að ræða og áætlaður kostnaður uppbyggingarinnar er einn og hálfur milljarður króna.

Stjórn Samherja fiskeldis hefur ákveðið að stækka landeldisstöð félagsins í Öxarfirði um helming, þannig að framleiðslan verði um þrjú þúsund tonn af laxi á ári. Áætlaður kostnaður er um einn og hálfur milljarður króna.

Þetta kemur fram á heimasíðu Samherja þar sem framkvæmdastjóri Samherja fiskeldis segir miðað við að framkvæmdum verði lokið eftir um það bil eitt ár. Sem hluti af hringrásarhagkerfi eldisins, bættri nýtingu og kolefnisjöfnun er landgræðsla og síðar skógrækt áformuð á nærliggjandi jörð, sem Samherji hefur keypt vegna stækkunarinnar.

Í fréttinni segir jafnframt að fyrirtækið hefur í nokkurn tíma kannað möguleika á að stækka landeldisstöðina í Öxarfirði.

Jón Kjartan Jónsson, framkvæmdastjóri Samherja fiskeldis, segir þar að framkvæmdir hefjist á næstunni, fyrst þurfi að ljúka vinnu við skipulagsmál á svæðinu sem er á lokastigi.

„Þetta er nokkuð umfangsmikið verkefni. Kerin sem við byggjum verða alls fimm vegna stækkunarinnar, um helmingi stærri að umfangi en stærstu ker sem fyrir eru. Þá þarf að auka sjótöku, byggja hreinsimannvirki, stoðkerfi og koma fyrir ýmsum tækjabúnaði. Undirbúningsvinnu er nú að mestu lokið, leyfin eru að klárast og næst er að hefjast handa,“ segir Jón Kjartan.

Undanfari landeldis á Reykjanesi

Samherji hefur keypt lóðina þar sem núverandi starfsemi fer fram og einnig jörðina Akursel, sem er vestan við stöðina. Jón segir að þar verði, auk sjótöku, nýttur áburður frá stöðinni til landgræðslu og síðar skógræktar.

„Samherji áformar að byggja upp allt að 40.000 tonna landeldi á laxi á Reykjanesi á næstu árum og þessi stækkun í Öxarfirði tengist þeim áformum. Það má segja að stækkunin fyrir norðan sé á vissan hátt undanfari þessa stóra verkefnis okkar á Reykjanesi. Við ætlum að prófa nýja hluti og í stærri einingum en áður og nýta þá reynslu við hönnun og rekstur á nýju stöðinni.“