mánudagur, 8. mars 2021
 
TölublöðVenjuleg útgáfa

Ufsinn torfundinn en ýsan er alls staðar

16. febrúar 2021 kl. 09:00

Helga María AK. Mynd/Brim

„Reyndar er það svo að við erum á hálfgerðum flótta undan ýsunni því það virðist vera ýsa alls staðar þar sem trolli er dýft,” segir Leifur Einarsson, skipstjóri á Helgu Maríu RE.

„Ufsinn er óvenju brellinn um þessar mundir. Hann hefur ekki fundist á Vestfjarðamiðum og hér fyrir sunnan land er leitun að honum. Við fáum eitt og eitt þokkalegt ufsahol og svo er leitað og leitað,” segir Friðleifur Einarsson, skipstjóri á ísfisktogaranum Helgu Maríu AK, í spjalli við heimasíðu Brims.

Að sögn Leifs hefur hann leitað fyrir sér á Eldeyjarbanka, Reykjanesgrunni og Fjöllunum að þessu sinni.

„Það er nóg af gullkarfa og ýsu en ufsinn er sem fyrr segir vandfundinn. Reyndar er það svo að við erum á hálfgerðum flótta undan ýsunni því það virðist vera ýsa alls staðar þar sem trolli er dýft,” segir Leifur en skipið á að vera í höfn í Reykjavík á fimmtudag.

Leifi reiknaðist til að aflinn væri kominn í 60 tonn þegar viðtalið var tekið.

„Við vildum gjarnan vera með meira en það hefur verið skítabræla á okkur og hvergi skjól að hafa. Veðrið var virkilega slæmt um helgina en við reyndum hvað við gátum. Við erum aðeins byrjaðir að verða varir við hrygningarþorsk en í augnablikinu höfum við þó mestar áhyggjur af því að veiða ekki of mikið af ýsu. Fiskurinn virðist annars vera vel haldinn og er stór og góður,” segir Friðleifur.