föstudagur, 22. janúar 2021
 
TölublöðVenjuleg útgáfa

Um 80 manns á 5 skipum koma að loðnuleit

5. janúar 2021 kl. 12:35

Mynd/Þorgeir Baldursson

Fimm skip leita nú loðnu og nýta sæmilegt veður fyrir helgina.

Kristján Þór Júlíusson, sjávarútvegs- og landbúnaðarráðherra, gerði á fundi ríkisstjórnarinnar í morgun grein fyrir stöðu loðnuleitar. Vísaði ráðherra til þess að í gær fóru bæði rannsóknaskip Hafrannsóknastofnunar ásamt þremur uppsjávarskipum til mælinga á loðnustofninum.

Frá þessu segir í tilkynningu frá ráðuneytinu.

Rannsóknaskipið Árni Friðriksson mun hefja mælingar út af Vestfjörðum en rs. Bjarni Sæmundsson mun leita og mæla á grunnslóð út af Norðurlandi.  Uppsjávarskipin Aðalsteinn Jónsson, Ásgrímur Halldórsson og Polar Amaroq munu leita út af Austfjörðum, Norðausturlandi og djúpt út af norðanverðu landinu.

Alls eru um 20 sérfræðingar Hafrannsóknastofnunar um borð í skipunum auk sjómanna skipanna. Því eru um 75-80 manns sem koma beint að verkefninu á hafi úti.

Í fjárlögum ársins 2021 var ákveðið að Hafrannsóknastofnun fái 120 milljón króna aukaframlag til rannsókna og leitar að loðnu „enda skiptir það miklu fyrir viðspyrnu efnahagslífsins að loðna veiðist í vetur,“ segir í tilkynningunni.

Hafrannsóknastofnun hefur gert samninga við útgerðir uppsjávarskipa um þátttöku í mælingum á loðnu í janúar og febrúar og gerir aukaframlagið það að verkum að hægt verður sinna mælingum með mörgum skipum og á þann hátt fá niðurstöður fáist á stuttum tíma þegar aðstæður á miðunum leyfa.