laugardagur, 5. desember 2020
 
TölublöðVenjuleg útgáfa

Útgerðarfélag Reykjavíkur fjárfestir í sjávarlíftækni

4. nóvember 2020 kl. 08:55

Runólfur V. Guðmundsson, framkvæmdastjóri ÚR og Steinar Kristjánsson, framkvæmdastjóri Zym Ice. Aðsend mynd

Fjárfestingin mun hraða þróun og dreifingu á Unbroken® fæðubótarefninu. Dreifing og sala vörunnar hefur aukist hratt undanfarið og er hún nú seld í 25 löndum í Evrópu og Norður-Ameríku.

Nýstofnað dótturfélag Útgerðarfélags Reykjavíkur hf., ÚR-Innovation ehf. hefur keypt 25% hlut í fyrirtækinu Zym Ice ehf. sem framleiðir fæðubótarefnið Unbroken®. Með fjárfestingunni stígur útgerðarfélagið fyrsta skrefið í átt að nýtingu sjávarlíftækni til að hámarka verðmæti sjávarafurða. Zym Ice er íslenskt fyrirtæki sem rekur verksmiðju í Noregi og tvær söluskrifstofur erlendis. Fjárfestingin styrkir stöðu Zym Ice og hraðar þróun og dreifingu á vörum félagsins á alþjóðamarkaði.

Þetta kemur fram í tilkynningu frá fyrirtækinu. Þar segir að um byltingarkennt fæðubótarefni sé að ræða sem byggir á áralöngum rannsóknum og þróunarvinnu. Dreifing og sala vörunnar hefur aukist hratt undanfarið og er hún nú seld í 25 löndum í Evrópu og Norður-Ameríku. Helstu markaðir eru á sviði íþrótta, heilsu og næringarefna. Sérstaða vörunnar er 100% náttúruleg samsetning hennar en hún er unnin úr afskurði af sjávarfangi. Notkun hennar hraðar mjög upptöku næringar í vöðvum og styrkir ónæmiskerfið. Unbroken® er vottuð sem örugg vara (GRAS) hjá Fæðu- og lyfjaeftirliti Bandaríkjann (FDA) og þá er reglum Alþjóðalyfjaeftirlitsnefndar Ólympíunefndarinnar (WADA) fylgt við framleiðslu hennar.

Sjá nánar á www.unbrokenrtr.com/is

Runólfur V. Guðmundsson, framkvæmdastjóri Útgerðarfélag Reykjavíkur, segir í tilkynningunni að fjárfestingin gefi ÚR tækifæri til að víkka út starfsemi sína.

„Félagið öðlast nýja reynslu og þekkingu á sviði líftækni sem mun hjálpa okkur við hámarka virði afurða okkar. Eftir að hafa prófað Unbroken sjálfur með frábærum árangri er ég sannfærður um að Unbroken er einstakt tækifæri fyrir okkur til að hefja þá nauðsynlegu vegferð sem líftækni bíður uppá fyrir íslenskan sjávarútveg.“

Steinar Kristjánsson, framkvæmdastjóri Zym Ice, segir þar jafnframt:

„Með aðkomu ÚR skapast enn frekari tækifæri fyrir vöxt félagsins og þróun nýrra lausna í sjávarlíftækni. Fjárfesting ÚR er viðurkenning á því þróunarstarfi sem félagið hefur stundað á undanförnum árum. Við lítum björtum augum á samstarfið.“ 

Kemur fram í tilkynningunni að ÚR – Innovation ehf. sé nýstofnað dótturfélag Útgerðarfélags Reykjavíkur sem hefur að markmiði að vinna að nýsköpun, rannsóknum og vöruþróun í sjávarútvegi og er eigið fé dótturfélagsins 150 milljónir króna. Útgerðarfélag Reykjavíkur var stofnað 1998. Framtíðarsýn fyrirtækisins sé að fylgja nútímakröfum um arðbæran rekstur. ÚR hefur sett á oddinn að nýta auðlindir sjávar með sjálfbærum og ábyrgum hætti og hefur þrjár meginstoðir fyrir slíkan rekstur að leiðarljósi: Frumkvæði, áreiðanleika og virðingu.

Runólfur V. Guðmundsson er framkvæmdastjóri beggja félaganna.