miðvikudagur, 12. maí 2021
 
TölublöðVenjuleg útgáfa

Vinnsla krossfisks vart möguleg

21. apríl 2021 kl. 07:00

Útflutningur til Bandaríkjanna hefur varla svarað kostnaði. Aðsend mynd

Aurora Seafood hefur flutt út frosinn krossfisk til Bandaríkjanna, en það skilar varla kostnaðarverði við pökkun, frystingu og flutning og því er engin verðmætasköpun við framleiðsluna.

Aurora Seafood og Matís hafa tekið saman skýrslu um óbeinar veiðar á krossfiski við Ísland, hugsanlegar beinar veiðar og möguleika á verðmætasköpun úr afurðum.

Rætt var við fjölda skipstjóra sem stunda veiðar með plóg, þar sem þeir voru spurðir álits á möguleikum á nýtingu krossfisks og hvort þeir teldu beinar veiðar líklegar til árangurs. Skoðanir skipstjóra voru mjög mismunandi og ekki er hægt að tala um niðurstöður úr þeirri könnun.

Þetta kemur fram á heimasíðu Matís.

Þar segir að við mælingar hafi það valdið vonbrigðum hversu hátt magn kadmíns mældist í krossfiski, bæði sem veiddur var við austurströnd Íslands og vesturströndina. Leyfilegt magn kadmíns fyrir manneldisafurðir eru aðeins 0,5 milligrömm í grammi en mælt magn var 6,3 fyrir austan og 2,5 fyrir vestan. Vitað er að nálægð við eldvirkni veldur kadmín mengun í hægfara botnfiskdýrum og aðstæður hér við land eru einmitt á þann veg, segir í fréttinni.

„Einnig vakti það vonbrigði hversu hratt krossfiskurinn brotnaði niður og voru sýni orðin maukuð vegna ensímvirkni á einum til tveimur dögum. Próteinmagn krossfiska er aðeins um 12%, en vatnsinnihald um 67%. Ekki er talið líklegt að hægt verði að nýta krossfiskinn til manneldis miðað við þessar niðurstöður. Aurora Seafood hefur flutt út frosinn krossfisk til Bandaríkjanna, en það skilar varla kostnaðarverði við pökkun, frystingu og flutning og því er engin verðmætasköpun við framleiðsluna.“

Verkefnið sem fól í sér þessa forathugun á veiðum og vinnslu krossfisks við Ísland var stutt af Matvælasjóði (AVS rannsóknarsjóði í sjávarútvegi).

Fréttin birtist fyrst í Fiskifréttum 9. apríl.