föstudagur, 22. janúar 2021
 
TölublöðVenjuleg útgáfa

Áhyggjur af stofnvísitölu

4. janúar 2021 kl. 14:09

Stjórn Landssambands smábátaeigenda skorar á ráðherra að efna til endurskoðunar á aðferðarfræði Hafrannsóknastofnunar

Nýútkomin skýrsla Hafrannsóknastofnunar, Stofnmæling botnfiska að haustlagi 2020, var rædd á fundi stjórnar Landssambands smábátaeigenda þann 29. desember. 

„Niðurstaða umræðna var að vekja athygli á og lýsa áhyggjum vegna lækkunar á stofnvísitölu þorsks, sem mælist nú aðeins rúm 40% af því sem hún mældist í haustralli árið 2017,” segir í frásögn á vef sambandsins, smabatar.is

Í ályktun stjórnarinnar segir ennfremur:

„Samkvæmt skýrslunni er stofnvísitala þorsks í frjálsu falli, lækkar nú fjórða árið í röð og er rúm 40% af því sem hún mældist í haustralli árið 2017.

Mælingar úr haustralli stofnunarinnar staðfesta niðurstöður úr vorralli 2020 að stærð árganga 2014 og 2015 (5 og 6 ára) er langt frá því sem gert var ráð fyrir.   Árgangarnir hafa látið verulega á sjá.  Líklegast er að þeir hafi liðið fyrir vanveiði undanfarinna ára þar sem magn af stórþorski hefur vaxið gríðarlega.  Samdráttur í helstu fæðutegundum stórþorsksins, þ.e. loðnu, síld og kolmunna, virðist hafa stuðlað að stórauknu sjálfráni. Það hefur aukist um 100% milli ára.

Stjórn LS skorar á sjávarútvegsráðherra að efna til gagngerrar endurskoðunar á þeirri aðferðafræði sem Hafrannsóknastofnun hefur lagt til grundvallar ráðgjöf sinni undanfarna áratugi.  Það er hverjum manni augljóst að hún stenst ekki þær væntingar sem gerðar voru til hennar.“