miðvikudagur, 26. janúar 2022
 
TölublöðVenjuleg útgáfa

Enginn í land eftir löndun

15. janúar 2022 kl. 10:01

Vilhelm á toginu á loðnumiðunum á dögunum. Mynd/Guðmundur St. Valdimarsson

Vilhelm Þorsteinsson EA landaði í Neskaupstað á fimmtudaginn sínum öðrum loðnufarmi á vertíðinni. Skipstjóri segir áhöfnina í hálfgerðri sóttkví um borð vegna faraldursins.

Vilhelm Þorsteinsson EA landaði 2.060 tonnum í Neskaupstað á fimmtudag og fór hluti aflans til manneldis í fiskiðjuveri Síldarvinnslunnar. Þetta var annar loðnutúr Vilhelms á árinu, skipið hélt aftur á loðnumiðin í gærmorgun.

Frá þessu segir á heimasíðu Samherja.

Þar segir að til þessa hafði öll loðna sem borist hefur til Síldarvinnslunnar á vertíðinni farið til framleiðslu á mjöli og lýsi en eftir því sem loðnan stækkar er hægt að frysta loðnuna til manneldis.

Birkir Hreinsson skipstjóri segir að bræla á miðunum hafi gert flotanum erfitt fyrir síðustu sólarhringana.

„Veiðin hefur verið skást á morgnana og seinni partinn. Stærsta holið í þessum öðrum túr ársins var um 450 tonn, annars voru þau um og yfir 100 tonn. Þannig að þetta var nudd á okkur. Loðnan er hins vegar að stækka, sem þýðir að hægt er að vinna hana til manneldis og hluti aflans var frystur.“

Um tíu klukkustunda sigling er á miðin og fór Vilhelm af stað aftur á miðin, strax og búið var að dæla aflanum í land til vinnslu.

„Enginn í áhöfninni fór í land, skipið er í raun og veru sóttkví. Löndunargengið þurfti að athafna sig á framdekkinu, annars kom enginn um borð. Við förum eins varlega og hægt er á tímum Covid-19. Þetta er náttúrulega erfið og snúin staða en það er ekkert annað í boði,“ segir Birkir.