föstudagur, 14. maí 2021
 
TölublöðVenjuleg útgáfa

Fullfermi hjá Gullver NS

4. maí 2021 kl. 09:00

Gullver NS er að landa fullfermi á Seyðisfirði. Mynd/Ómar Bogason

Áhersla lögð á að veiða ufsa en það reynist mörgum erfitt að finna hann þessa dagana.

Ísfisktogarinn Gullver NS landaði fullfermi á Seyðisfirði í gær. Aflinn var rúm 114 tonn og er uppistaðan þorskur og ufsi. Um að ræða nítjándu veiðiferð skipsins á árinu en auk þess landaði það tvisvar þegar tekið var þátt í togararalli Hafrannsóknastofnunar í marsmánuði.

Þetta kemur fram í frétt á heimasíðu Síldarvinnslunnar sem ræddi við Hjálmar Ólaf Bjarnason stýrimann.

„Jú, þetta var bara fínasti túr. Það er lögð mikil áhersla á að finna ufsa en það gengur misjafnlega hjá okkur og reyndar hjá öllum. Við fengum smá ufsaskot í þessum túr. Við veiddum víða að þessu sinni. Við vorum í Hvalbakshallinu en það var líka farið í Berufjarðarálinn, á Papagrunn og í Lónsbugtina og Lónsdýpið. Veðrið var gott má segja. Við fengum smá kaldaskít um tíma en hann gekk fljótt yfir. Að þessu sinni vorum við í fjóra og hálfan sólarhring að veiðum þannig að það er engin ástæða til að kvarta undan aflabrögðum,“ segir Hjálmar Ólafur, í viðtalinu.

Gert er ráð fyrir að Gullver haldi á ný til veiða í kvöld.