þriðjudagur, 17. maí 2022
 
TölublöðVenjuleg útgáfa

Síld og Austurdjúpið rannsakað í 28. sinn

11. maí 2022 kl. 12:01

Hafrannsóknaskipið Árni Friðriksson. Mynd/Einar Ásgeirsson

Árni Friðriksson hefur lokið viku af 20 daga rannsóknartíma í árlegum leiðangri.

Hafrannsóknaskipið Árni Friðriksson hélt fyrir viku síðan af stað í leiðangurinn „Vistfræði Austurdjúps“. Eitt af meginmarkmiðum verkefnisins er að meta magn og útbreiðslu norsk-íslenskrar síldar og annarra uppsjávartegunda í Austurdjúpi og á Austur- og Norðausturmiðum.

Þetta kemur fram í frétt Hafrannsóknastofnunar.

Þar segir að einnig er ástand hafsins og vistkerfisins kannað, m.a. hita- og seltustig og magn átustofna metið. Því til viðbótar eru líffræðingar á vegum Háskóla Íslands um borð, en þeir sinna talningu og skráningu sjávarspendýra með áherslu á auknar rannsóknir á andarnefju.

Leiðangurinn er skipulagður af vinnuhóp á vegum Alþjóða hafrannsóknaráðsins (ICES) en auk rannsóknaskipsins Árna Friðrikssonar, taka rannsóknaskip frá Noregi, Færeyjum, Danmörku og Bretlandi þátt í verkefninu. Áætlað er að leiðangurinn muni taka 20 daga.

„Leiðangurinn hefur verið farinn árlega síðan 1995 og gefa niðurstöður hans m.a. eina mikilvægust tímaröð bergmálsmælinga sem notaðar eru við stofnmat og veiðiráðgjöf norsk-íslenska síldarstofnsins innan Alþjóða hafrannsóknaráðsins,“ segir í fréttinni.