sunnudagur, 7. mars 2021
 
TölublöðVenjuleg útgáfa

Varðskip og þyrlur sinna eftirliti með loðnuveiði

12. febrúar 2021 kl. 15:50

TF-GRO í eftirlitsflugi. Mynd/Gæslan

Áhöfnin á Þór og eftirlitsmenn Fiskistofu fóru um borð í loðnuskip í vikunni. Norðmenn langt komnir með sinn kvóta.

Landhelgisgæsla Íslands og eftirlitsmenn Fiskistofu hafa að undanförnu sinnt víðtæku eftirliti á loðnumiðum með varðskipunum Tý og Þór. Einnig hefur þyrlusveit Gæslunnar sinnt eftirliti úr lofti. Þá hefur stjórnstöð Landhelgisgæslunnar haft heildarsýn yfir veiðarnar, verið í reglulegu sambandi við skipin, móttekið frá þeim tilkynningar um afla og leiðbeint um ýmis atriði.

Þetta kemur fram í tilkynningu frá Landhelgisgæslunni en í morgun voru sex norsk loðnuskip á veiðum auk eins skips frá Færeyjum. Þá voru tvö erlend skip á leið á miðin. 

Landhelgisgæslan hefur það hlutverk að fara um borð í erlend loðnuveiðiskip sem eru á leið frá landinu og hyggjast landa aflanum erlendis. Í slíkum tilvikum kannar Landhelgisgæslan afla þeirra og ber hann saman við aflaskeyti skipanna sem send eru til sameiginlegrar eftirlitsstöðvar Landhelgisgæslunnar og Fiskistofu til að kanna hvort misræmi sé þar á milli. Í gær fór áhöfnin á Þór um borð í þrjú norsk loðnuveiðiskip ásamt eftirlitsmönnum Fiskistofu. Þar reyndist allt vera samkvæmt bókinni.

Í morgun höfðu norsk loðnuveiðiskip veitt samtals tæplega 35 þúsund tonn af tæplega 42 þúsund tonna heildarveiðiheimildum. Færeysk og grænlensk veiðiskip hafa ekki hafið veiðar að neinu ráði enda eru ekki sömu tímatakmarkanir á þeirra veiðum eins og gilda um veiðar norskra veiðiskipa.

Við för frá miðunum að loknum veiðum hefur Landhelgisgæslan heimild til að senda erlend fiskiskip á fyrirfram skilgreinda eftirlitsstaði og fer það eftir aðstæðum hvort eftirlitsmenn fara um borð til eftirlits. Ef ekki er talin ástæða til að fara um borð í skipin eru áhafnir þeirra beðnar um rafræn gögn sem eru yfirfarin áður en Landhelgisgæslan veitir skipinu heimild til áframhaldandi ferðar út úr efnahagslögsögunni.