laugardagur, 4. desember 2021
 
TölublöðVenjuleg útgáfa

Veisla hjá uppsjávarskipunum fyrir austan

21. október 2021 kl. 07:00

Beitir NK á veiðum. Mynd/Þorkell Pétursson

Skipstjórinn á Beiti NK telur líklegt að loðnunótin verði tekin um borð fljótlega. Mikil tilhlökkun er fyrir komandi loðnuvertíð en fyrst skal ljúka veiðum á síld og kolmunna.

Það er stutt á milli landana uppsjávarskipa Síldarvinnslunnar í Neskaupstað þessa dagana. Í færslu á heimasíðu fyrirtækisins segir frá því að nýlokið var við að landa 1.600 tonnum af norsk-íslenskri síld úr Beiti NK . Að sjálfsögðu fer síldin öll til manneldisvinnslu. Þá va einnig nýlokið við að landa 1.100 tonnum af kolmunna úr Barða NK en sá afli fer til framleiðslu á fiskimjöli.

Heimasíðan sló á þráðinn til Tómasar Kárasonar, skipstjóra á Beiti, og spurði frétta.

„Að löndun lokinni verður stefnan tekin á Rósagarðinn og kolmunnanum sinnt. Vonandi á það eftir að ganga vel. Hvað gerist svo er ég ekki með á hreinu en ekki er ólíklegt að loðnunótin verði tekin um borð næst þegar í land verður komið. Loðnuvertíðin er svo sannarlega tilhlökkunarefni og maður finnur spennuna í loftinu. Staðreyndin er sú að uppsjávarveiðarnar blómstra um þessar mundir. Veiðar á norsk-íslensku síldinni hafa gengið frábærlega og hún hefur veiðst við bæjardyrnar. Kolmunnaveiðarnar hafa líka gengið vel og nú er hann veiddur inni í íslenskri lögsögu sem er afar mikilvægt. Þá kemur fljótlega að veiðum á íslenskri sumargotssíld og ég hef þá trú að þær eigi eftir að ganga eins og í sögu. Það er einungis makríllinn sem hefur verið að stríða okkur, en hann hefur fjarlægst landið og það hefur verið býsna langt að sækja hann. Fyrir okkur, sem erum á uppsjávarskipunum, má segja að þetta sé nánast ein allsherjar veisla,“ segir Tómas.